जनकपुरधाम – धनुषाको लालगढबाट एक जना सशस्त्र प्रहरी निरीक्षक घुससहित पक्राउ परेका छन्। पक्राउ पर्नेमा सशस्त्र प्रहरी निरीक्षक ओकिल अधिकारी रहेका छन्।
अख्तियार दुरुपयोग अनुसन्धान आयोगको क्षेत्रीय कार्यालय बर्दिबासको टोलीले उनलाई शुक्रबार बिहान लालगढबाट ४० हजार रुपैयाँ घुससहित पक्राउ गरेको जनाएको छ।
अख्तियारका अनुसार कमला–ढल्केवर–बाग्मती सडक निर्माण खण्डअन्तर्गत माटो तथा ग्राभेल फिलिङ कार्यमा संलग्न सवारी साधनहरू रोकी अनावश्यक अवरोध सिर्जना गर्दै घुस माग्ने गरेको उजुरीका आधारमा निगरानी गरिएको थियो।
सोही क्रममा अधिकारीलाई रकम लिँदै गर्दा पक्राउ गरिएको हो। घटनाबारे थप अनुसन्धान भइरहेको अख्तियारले जनाएको छ।
