काठमाडौं । अमेरिकी विदेश मन्त्रालयका दक्षिण तथा मध्य एशिया मामिला हेर्ने सहायक विदेशमन्त्री समीर पल कपुर आगामी साता काठमाडौं आउने भएका छन् ।
भारतीय मूलका कपुर बालेन शाह नेतृत्वको नयाँ सरकारसँग सम्बन्ध विस्तार गर्ने उद्देश्यसहित सोमबार काठमाडौं आउन लागेका हुन् ।
काठमाडौं बसाइका क्रममा उनले उच्चस्तरीय भेटघाट गर्नुका साथै सरकारका केही मन्त्रीहरूसँग पनि छलफल गर्ने कार्यक्रम रहेको जनाइएको छ ।
गत वर्ष अक्टोबरमा अमेरिकी राष्ट्रपति डोनाल्ड ट्रम्प ले कपुरलाई दक्षिण एशिया मामिला हेर्ने सहायक विदेशमन्त्रीमा नियुक्त गरेका थिए । यसअघि उक्त जिम्मेवारी डोनाल्ड लु ले सम्हाल्दै आएका थिए ।
वाशिङ्टन डीसीस्थित नेपाली दूतावासका कूटनीतिज्ञ तथा परराष्ट्र मन्त्रालयका अधिकारीलाई उद्धृत गर्दै द काठमाडौं पोस्ट ले कपुरको काठमाडौं भ्रमण तीन दिनको हुने जनाएको छ । समाचारअनुसार उनी टर्किस एयरलाइन्समार्फत काठमाडौं आउने र बुधबार फर्किने छन् ।
यद्यपि, भ्रमणबारे औपचारिक घोषणा भने भइसकेको छैन । परराष्ट्र मन्त्रालयले पनि यस विषयमा कुनै आधिकारिक जानकारी सार्वजनिक गरेको छैन ।
यदि उनी सोमबार काठमाडौं आइपुगे, भने बालेन नेतृत्वको सरकार बनेपछि आउने सबैभन्दा वरिष्ठ विदेशी कूटनीतिज्ञका रूपमा उनको भ्रमणलाई महत्वपूर्ण मानिएको छ ।
