मधेशको प्रमुख सहर वीरगञ्जमा जारी चर्को गर्मीका कारण जनजीवन प्रभावित बनेको छ। दैनिक रूपमा तापक्रम ४० डिग्री सेल्सियस नजिकै पुग्दा विशेषगरी नवजात शिशु, वृद्धवृद्धा र श्रमजीवी वर्गलाई अत्यन्त कठिनाइ भएको छ।
दिनभरको तेज घाम र उमसले गर्दा दैनिक ज्यालादारी गर्ने श्रमिकहरू काम गर्न नसक्ने स्थितिमा छन्। अधिकांश मानिसहरु बिहानैदेखि घरभित्र सीमित छन्, बजार क्षेत्रहरू सुनसान जस्ता देखिएका छन्।
“गर्मीले काम गर्न सकिँदैन, शरीर नै चल्दैन,” वीरगञ्जको एक निर्माण मजदूरले गुनासो गरे।
स्थानीय अस्पताल तथा क्लिनिकहरूमा डिहाइड्रेसन, घाम लाग्ने, र लु लाग्ने समस्या लिएर आउने बिरामीको सङ्ख्या बढ्दै गएको चिकित्सकहरूले बताएका छन्। तातो लहरको असर नवजात शिशु र वृद्ध नागरिकमा बढी देखिएको छ।
चिकित्सकहरूले प्रशस्त पानी पिउन, घामबाट जोगिन, र शरीरलाई चिसो राख्ने उपायहरू अपनाउन सुझाव दिएका छन्।
