सौर्य एअरलाइन्सको नाइन–एन–एएमई–सीआरजे २०० जहाज दुर्घटनासम्बन्धी जाँचबुझ गर्न गठन गरिएको आयोगले आफ्नो अन्तिम प्रतिवेदन सरकारलाई बुझाएको छ।
आज संस्कृति, पर्यटन तथा नागरिक उड्डयन मन्त्रालयमा आयोजित कार्यक्रममा आयोगका अध्यक्ष तथा नेपाल नागरिक उड्डयन प्राधिकरणका पूर्वमहानिर्देशक रतिशचन्द्रलाल सुमनले पर्यटनमन्त्री बद्रीप्रसाद पाण्डेलाई प्रतिवेदन हस्तान्तरण गर्नुभयो।
मन्त्री पाण्डेले कुनै मुलाहिजा नराखी आएको प्रतिवेदनलाई यथाशक्य चाँडै कार्यान्वयनमा लैजाने प्रतिबद्धता व्यक्त गर्नुभयो। मन्त्रालयले आयोगको प्रतिवेदन आजै आफ्नै वेबसाइटमार्फत सार्वजनिक गरेको छ।
साउन ९ गते मर्मतका लागि काठमाडौंबाट पोखरातर्फ उडेको सो जहाज त्रिभुवन अन्तर्राष्ट्रिय विमानस्थलको धावनमार्ग नजिकै दुर्घटनामा परेको थियो। दुर्घटनामा १८ जनाको ज्यान गएको थियो भने पाइलट मनीष शाक्य भने सकुशल रहनुभएको थियो।
दुर्घटनापछि सरकारले रतिशचन्द्रलाल सुमनको अध्यक्षतामा जाँचबुझ आयोग गठन गरेको थियो। आयोगको प्रतिवेदनमा दुर्घटनाको कारण, सावधानीका उपाय र भविष्यमा यस्ता दुर्घटना नदोहरियोस् भन्नका लागि सुझावहरू समावेश छन्।
