वीरगञ्ज । वीरगञ्ज नाका हुँदै एलपी ग्यास आयातमा पछिल्लो समय उल्लेख्य वृद्धि भएको छ । पछिल्लो करिब डेढ महिनाको अवधिमा २ हजार १३६ वटा ग्यास बुलेट नेपाल भित्रिएको तथ्यांक सार्वजनिक भएको हो ।
मध्यपूर्व क्षेत्रमा देखिएको अस्थिरताका कारण ग्यास आपूर्तिमा दबाब बढिरहेका बेला वीरगञ्ज नाका ग्यास आयातको प्रमुख मार्गका रूपमा स्थापित भएको छ । भन्सार कार्यालयका अनुसार फागुन महिनामा मात्रै १ हजार ५६० बुलेट ग्यास भित्रिएको थियो भने चैत १३ गतेसम्म थप ५७६ बुलेट आयात भइसकेका छन् ।
एकीकृत भन्सार जाँच चौकीका अधिकारीहरूका अनुसार आपूर्ति सहज बनाउन आयात बढाइएको हो । चालु आर्थिक वर्षको सात महिनामा यस नाका हुँदै २० अर्ब ८५ करोड रुपैयाँ बराबरको २० करोड किलोभन्दा बढी एलपी ग्यास आयात भएको जनाइएको छ ।
गत वर्षको तुलनामा केही कमी देखिए पनि हालको आपूर्ति सन्तुलित राख्न निरन्तर प्रयास भइरहेको जनाइएको छ । साथै सम्भावित संकट व्यवस्थापनका लागि भण्डारण, वितरण तथा वैकल्पिक स्रोतको तयारीसमेत भइरहेको सरोकारवाला निकायले बताएका छन् ।
