भदौ २७, वीरगञ्ज । उद्यमी अशोककुमार टेमानी वीरगञ्ज महानगरको सल्लाहकार नियुक्त भएका छन् । नगर प्रमुख राजेशमान सिंहले टेमानीलाई सल्लाहकार नियुक्त गरेका हुन् ।
सल्लाहकार टेमानीबाट वीरगञ्जको विकासका लागि महानगरले सञ्चालन गरेका योजना र भविष्यमा लिने रणनीतिबारेमा योगदान पुग्ने विश्वास प्रमुख सिंहले लिएका छन् ।
नेपाल–भारत सोसियोइकोनोमिक फोरमको अध्यक्ष रहेका टेमानी विकासका अवधारणामा दूरदृष्टिकोण राख्न सक्ने अगुवाको रुपमा चिनिन्छन् ।
वीरगञ्ज उद्योग वाणिज्य संघको अध्यक्ष रहिसकेका टेमानीले सो कार्यकालमा बारा र पर्साको दीर्घकालीन विकासलाई समेटेर ‘ग्रेटर वीरगञ्ज’को अवधारणा ल्याएका थिए ।
नेपाल उद्योग वाणिज्य महासंघको केन्द्रीय कार्यकारिणी सदस्यसमेत रहिसकेका उनी अहिले महासंघ मधेस प्रदेशको पारवाहन समितिको संयोजक पनि हुन् । टेमानी वैदेशिक व्यापार र पारवहनका क्षेत्रमा जानकार उद्यमीको रुपमा परिचित छन् ।
