वीरगञ्ज । वीरगञ्ज भन्सार क्षेत्रबाट सशस्त्र प्रहरी बल नेपाल ले स्रोत नखुलेको २० लाख बढी रकमसहित एक जनालाई पक्राउ गरेको छ ।
पक्राउ पर्नेमा वीरगञ्ज महानगरपालिका–१७ अलौंका ५० वर्षीय विनयशंकर साह तुराहा रहेका छन् ।
भारतको रक्सौल बाट वीरगञ्जतर्फ आउँदै गरेको बीआर ०५ बीके ८६०३ नम्बरको मोटरसाइकलमा सवार उनलाई भन्सार कार्यालय अगाडि रोकेर चेकजाँच गरिएको थियो ।
चेकजाँचका क्रममा मोटरसाइकलको सिटकभर मुनि लुकाएर राखिएको अवस्थामा नेपाली २० लाख २ हजार ५० रुपैयाँ र भारतीय ६ सय रुपैयाँ बरामद गरिएको प्रहरीले जनाएको छ ।
बरामद रकमको स्रोत खुलाउन नसकेपछि उक्त रकम र मोटरसाइकलसहित उनलाई नियन्त्रणमा लिइएको सशस्त्र प्रहरी बल नम्बर १३ गण पर्साका सशस्त्र प्रहरी नायब उपरीक्षक मोहनराज निरौलाले जानकारी दिए ।
पक्राउ परेका तुराहालाई आवश्यक कारबाहीका लागि वीरगञ्ज भन्सार कार्यालयमा बुझाइएको प्रहरीले जनाएको छ ।
